Alltof hollur matur í Biggest Loser Ísland

Kvikmyndagerðamaðurinn Gunnar Bjarni Guðbjörnsson, Gussi, vinnur við gerð þáttanna Biggest Loser Ísland. Hann er búinn að missa fjögur kíló við gerð þáttanna á síðustu þremur vikum. Ástæðan er hollustufæðan sem starfsmenn og keppendur fá við tökurnar.

Á Facebook-síðu sinni hefur hann birt myndir af matnum sem starfsmenn fá og kvartar yfir alltof hollum mat. Á einum stað segir hann „Crew Catering í Biggest Loser í dag, tvær ananassneiðar, gróf brauðsneið með engu og grænn safi."

„Ég sakna alls ekki þessa rúmlega fjögurra kílóa sem ég er búinn að missa frá því að við byrjuðum en mig langar nú oft í hefðbundið fæði," segir Gussi í samtali við Vísi.

Lilja Katrín Gunnarsdóttir, kynningarstjóri SagaFilm, segir starfsmenn þáttanna almennt sátta við að fá hollan mat frá Happ á hverjum degi.

„Hér er grænn djús, hollt brauð og ósköp litríkur, fallegur og hollur matur. Það langar engan lengur í kók og súkkulaði enda sést það aldrei hér á setti. Þetta eru ákveðin viðbrigði og tók smá tíma að venjast þessu en kílóin hrynja af fólki.“

Byrjað verður að sýna þættina á Skjá einum í lok janúar. Lilja Katrín segir upptökur ganga vel. „Það er alveg stórkostlegt að fylgjast með keppendunum, þetta eru miklar fyrirmyndir og gengur vægast sagt mjög vel hjá þeim að breyta um lífsstíl.“