Átta ár fyrir nauðgun og hrottalegt ofbeldi

Héraðsdómur Reykjavíkur dæmdi í gær Jens Hjartarson, 33 ára, í átta ára fangelsi fyrir að nauðga stúlku og beita þrjár til viðbótar hrottalegu ofbeldi. Þá er hann fundinn sekur um tvær líkamsárásir að auki.

Í dómnum segir að brotin gegn konunum hafi öll verið „hrottaleg og beinast að líkama, kynfrelsi og andlegri heilsu þeirra, auk þess að vera með öllu tilefnislaus“.

Árásirnar gegn konunum fjórum voru gerðar á stuttu tímabili, frá því í ágúst og fram í desember í fyrra. Þá var hann handtekinn á gistiheimili í miðbænum fyrir að ganga þar hrottalega í skrokk á átján ára stúlku sem hann hafði kynnst í meðferð. Hann játaði að til átaka hefði komið en sagðist ekkert muna eftir atvikum.

Hann er sakfelldur fyrir að hafa slegið hana ítrekað í andlitið, sparkað í höfuð hennar og líkama, traðkað á andliti hennar, barið hana með eldhússtól, dregið hana á hárinu eftir gólfinu, haldið fyrir vit hennar þannig að hún náði ekki andanum og lagt hníf að hálsi hennar og hótað henni lífláti.

Fyrsta árásin átti sér stað fjórum mánuðum fyrr, í ágúst í fyrra. Þá þvingaði hann stúlku til samræðis og endaþarmsmaka á heimili hennar. Hann neitaði sök en framburður konunnar er metinn trúverðugri, auk þess sem skoðun lækna benti eindregið til þess að stúlkunni hefði verið nauðgað.

Fram kemur í dómnum að stúlkan hafi ekki treyst sér til að búa heima hjá sér síðan, hún sé nú alltaf hrædd, félagsfælin og vantreysti fólki.

Um miðjan október ruddist hann inn á fyrrverandi unnustu sína eftir að hafa séð hana á tali við ókunnugan mann í bakaríi. Hann reiddist mjög, sló konuna í tvígang og í síðara skiptið þannig að hún féll á klósett og missti meðvitund. Þegar hún rankaði við sér var Jens að kveikja í bolnum sínum.

Konan fór þá inn í svefnherbergi til dóttur sinnar og þar réðst hann á hana aftur, þegar hún var með barnið í fanginu, þannig að samfella barnsins varð útötuð í blóði. Í dómnum segir að barnið hafi grátið og Jens þá öskrað: „Þegiðu krakki!“ og reynt að slá til þess. Í dómnum segir að konan hafi síðan þurft að ávinna sér traust barnsins að nýju.

Tveimur vikum síðar réðst hann á fjórðu stúlkuna, sautján ára gamla, kýldi hana í andlitið og meira til.

Jens er auk þess sakfelldur fyrir að berja bróður sinn með billjardkjuða, ráðast á starfsmann á bensínstöð og ýmis önnur smávægilegri brot.