Könnuðu öryggi í Fljótunum

Verið er að undirbúa áætlun um móttöku á fluguveiðimönnum á sumrin og skíðamönnum á veturna í Fljótunum á Tröllaskaga.

Bandarískir leiðsögumenn með sérfræðiþekkingu á snjóflóðum hafa undanfarna daga dvalist í Fljótunum til að meta aðstæður og öryggi fyrir hugsanlega vetrarþjónustu.

„Þetta er búinn að vera draumur í mörg ár að koma upp þarna mikilli aðstöðu. Ég er búinn að vera í sjö ár að undirbúa ána til þess að gera þetta að einu miklu ævintýri,“ segir Orri Vigfússon, frumkvöðull úr Fljótunum. Bandarísku leiðsögumennirnir voru hér á vegum Orra sem vonar að hægt verði að koma upp fullnægjandi aðstöðu á allra næstu árum.

Leiðsögumennirnir köstuðu sér úr þyrlum hátt í hlíðum fjallanna fyrir ofan Siglufjörð og Ólafsfjörð og renndu sér niður á skíðum og snjóbrettum með tilheyrandi tilþrifum. Um aðferðir leiðsögumannanna til að kanna öryggið í fjöllunum segir Orri að svona séu athuganirnar gerðar erlendis. „Svona er þetta gert í Colorado og í vesturhluta Kanada þar sem svona ferðaiðnaður er stundaður.“

Orri segir svona ferðaþjónustu dýra en þeim mun stærri erlendis. „Þetta er fyrir þá sem geta borgað mikið fyrir. Það kostar auðvitað mikið að leigja tvær þyrlur allan daginn. Það er samt lagt gríðarlega mikið upp úr öryggismálum.“