Ný lyfta í Skálafell?: "Þetta myndi stækka skíðasvæðið mjög mikið"

Hópur sem nefnist Opnum Skálafell vill að sett verði diskalyfta upp á Skálafell, frá enda stólalyftunnar að mastrinu á toppi fjallsins. Talsmenn hans telja þetta hagkvæman og raunhæfan kost sem gæti lengt skíðavetur borgarbúa mikið.

„Við sjáum þetta fyrir okkur sem sniðugan millileik á meðan ekki er til fjármagn í snjóframleiðslu, sem er náttúrulega mest aðkallandi málið fyrir skíðasvæði á suðvesturhorninu,“ segir Kári Sævarsson, forsprakki Opnum Skálafell.

Kári segir skort á vatni hafa verið notaðan sem rök fyrir því að fara ekki í snjóframleiðslu í Bláfjöllum og bendir á að í Skálafelli sé nóg af vatni. Hann segir diskalyftu á toppinn hagkvæman kost til að tryggja fleiri opnunardaga á skíðasvæðum höfuðborgarinnar og Anna Laufey Sigurðardóttir, formaður skíðadeildar KR, tekur undir. „Það er alltaf snjór í skálinni fyrir ofan stólalyftuna svo þótt ekki sé hægt að opna hana vegna snjóleysis, þá er snjór til staðar þarna efst uppi. Svo gæti þetta verið fyrsta skrefið í átt að uppbyggingu í Norðurhlíðinni, sem við erum alltaf að horfa til,“ segir Anna Laufey.

Þau segja norðurhlið Skálafells bjóða upp á veðursæld og mikið snjóöryggi auk þess sem ekki þurfi að fara út í landmótun. Möguleikar til uppbyggingar þar væru því miklir að þeirra mati, ekki síst ef diskalyftan væri komin á toppinn. Þau segja hægt að færa aðra af diskalyftunum neðar í fjallinu þangað upp og að þar gæti hún til dæmis nýst fjölskyldufólki, æfingakrökkum og snjóbrettafólki, sem oft geti gert mikið úr litlu. „Þetta myndi líka bæta nýtingu á fjallinu og stækka skíðasvæðið mjög mikið, því utanbrautarfólk gæti til dæmis skíðað langt út með hlíðinni,“ bendir Anna Laufey á.

Hvað teljið þið að þetta gæti lengt skíðatímabilið mikið?

„Við gætum byrjað starfsemi hérna um miðjan nóvember, býst ég við,“ segir Anna Laufey. „Já og sem dæmi má nefna að síðasta vetur var skafl í skálinni langt fram í maí,“ bætir Kári við.

Hér má sjá facebooksíðu Opnum Skálafell