Þótti sér líkt við Göbbels

„Ég mótmæli harðlega samlíkingu formanns bæjarráðs um að líkja mér við áróðursmálaráðherra nasista í seinni heimsstyrjöldinni, hún er honum til skammar," bókaði áheyrnarfulltrúi Íbúahreyfingarinnar, Jón Jósef Bjarnason, á bæjarráðsfundi í Mosfellsbæ. Verið var að ræða byggingu hjúkrunarheimilis.

Hafsteinn Pálsson, formaður bæjarráðs úr Sjálfstæðisflokki, sagði ekki rétt að hann hafi líkt Jóni við umræddan ráðherra; Jósef Göbbels.

„Hins vegar var um margítrekaðar fullyrðingar að ræða sem hann hefur ávallt fengið skýringar á að ekki eigi við rök að styðjast. Í ljósi þess að hann hafði þennan skilning á því sem ég hafði sagt bauð ég fram afsökunarbeiðni á orðum mínum sem hann ekki þáði," bókaði Hafsteinn.