Mest hægt að vinna 15 milljarða króna

Íslendingar verða í fyrsta skipti með í Eurojackpot lottóinu þegar dregið verður í dag. Vinningar í Eurojackpot geta numið milljörðum króna. Lágmarksvinningsupphæð í hverri viku er tíu milljón evrur, eða jafnvirði 1,7 milljarða íslenskra króna, og getur hæst orðið 90 milljón evrur, eða 15 milljarðar króna. Ein röð kostar 320 krónur.

Íslensk getspá hefur umsjón með Eurojackpot á Íslandi

„Það er von mín að ávinningur af leiknum skili sér til spilaranna í spennandi vinningum á sama tíma og hann styrki mikilvægt starf íþrótta- og ungmennafélagshreyfingarinnar og öryrkja í landinu," segir Stefán Konráðsson, framkvæmdastjóri Íslenskrar getspár.

Eurojackpot hóf göngu sína í mars á síðasta ári og er leikurinn nú spilaður í fjórtán löndum. Auk Íslands eru það Danmörk, Noregur, Svíþjóð, Finnland, Eistland, Lettland, Litháen, Þýskaland, Holland, Króatía, Slóvenía, Ítalía og Spánn.

Líkt og í öllum happdrættum eru vinningsmöguleikar ekki sérlega miklir. Líkurnar á þeim stóra eru einn á móti 59,3 milljónum. Leikurinn gengur út á að finna fimm réttar tölur af fimmtíu, og tvær stjörnutölur af átta á leikspjaldinu. Nálgast má miða á sölustöðum Íslenskrar getspár og á lotto.is.

Fyrsti útdráttur er í dag eins og áður sagði og loka sölustaðir klukkan 18.