Aðvörunarkerfi kom í veg fyrir innbrot

Í nótt var gerð tilraun til innbrots í verkstæði á Kjalarnesi, en þeir sem þar voru að verki hurfu á braut þegar aðvörunarkerfi fór í gang.

Skömmu síðar var maður handtekinn eftir að hafa farið inn í bíla við Álfheima. Engu var stolið en við leit á manninum fundust ætluð fíkniefni og var hann því vistaður í fangageymslu lögreglu og verður yfirheyrður í dag.

Þá voru fjórir ökumenn teknir grunaðir um akstur undir áhrifum fíkniefna, þeir allir lausir að lokinni skýrslutöku og töku blóðsýnis, að því er segir í tilkynningu frá lögreglunni.