Kærkominn körfuboltaþáttur væntanlegur

„Það er nóg komið af umfjöllun um fótbolta og handbolta, nú er komið að körfuboltanum,“ segir Sverrir Bergmann um kærkominn körfuboltaþátt sem hefur göngu sína á Stöð 2 Sport um miðjan október. Þættirnir, sem eru tólf talsins, heita Liðið mitt og er hver þáttur tileinkaður einu liði í Dominos-deild karla.

„Við dveljum hjá hverju liði í nokkra daga, förum á æfingar með þeim og tölum við goðsagnirnar sem tengjast hverjum og einum klúbb,“ segir Sverrir.

Farið er um víðan völl í þáttunum og fer Sverrir meðal annar í matarboð hjá landsliðsmanninum og liðsmanni KR, Pavel Ermolinski. „Pavel er fanta kokkur sem bauð upp dýrindis pasta með mozarella osti og papriku.“

Áhorf á íslenskan körfubolta hefur aukist mikið undanfarin ár og er úrslitakeppnin sérlega vinsælt og spennandi sjónvarpsefni. „Það er kominn tími á að það verði fjallað um íslenska körfuboltann á skemmtilegan hátt,“ bætir Sverrir við.

Í þáttunum verður einnig gegnum gangandi þriggja stiga keppni á milli liða, þar sem liðsmenn reyna að raða niður eins mörgum þristum og hægt er fyrir hönd síns liðs.

Fyrsta umferð Dominos-deildarinnar fer fram 10. október og verður bein útsending frá leik Grindavíkur og KR á Stöð 2 Sport, um svipað leyti og þátturinn hefur göngu sína.