Skipti Gylfa út vegna „hommastríðs“

Dr. Gunni ákvað að skipta út Gylfa Ægissyni sem forsöngvara í laginu Brjálað stuðlag! sem er komið í spilun. Dr. Gunni greinir frá þessu á bloggsíðu sinni og segir að „gúddvill“ þjóðarinnar í garð Gylfa hafi verið í lágmarki og því hafi hann ákveðið að skipta Gylfa út sem söngvara lagsins. Sólmundur Hólm, eftirherma, skemmtikraftur og ævisagnaritari Gylfa, syngur í hans stað.

Ástæðan fyrir skiptunum er sú að Gylfi hefur að undanförnu haft sig í frammi í mótmælum við skipuleggjendur Gleðigöngunar. Gylfi lagði nýverið fram kæru til lögreglunnar á skipuleggjendur hátíðarinnar vegna „klámfenginna orða sem áttu að hafa borist í eyru lítilla barna á Gay Pride 2013“.

„Mér finnst Gylfa reyndar frábær sama hvað hver segir (fyrir utan „hommastríðið“ sem ég játa að ég skil bara ekkert í), en svona stríðsmaður er bara einum of vafasamt dæmi til að hægt sé að bera það á borð fyrir æsku landsins. Það ber vott um jákvæða siðferðisafstöðu þjóðarinnar að miklu betra hefði verið fyrir lagið ef Gylfi hefði komið út úr skápnum,“ skrifar Dr. Gunni á bloggsvæði sínu.

Texti lagsins fjallaði upphaflega um það þegar Gylfi, í eigin persónu, hittir Fýlustrákinn. Fýlustrákurinn kemur einnig við sögu á fyrri barnaplötu Dr. Gunna og vina hans, Abbababb! sem kom út árið 1997. Viðlag lagsins átti að hljóða eftirfarandi: „Ég heiti Gylfi Ægisson, ég er í stuði lon og don“. Í ljósi þeirrar umræðu sem var í kringum Gylfa á þessum tíma þá ákvað Dr. Gunni að breyta textanum í flutningi Sólmundar Hólm og er hann nú: „Ég heiti Villi Stuðmundsson, ég er í stuði lon og don…“

Dr. Gunni segir að hann hafi í samráði við Gylfa skipt um söngvara. „Með fullu samþykki Gylfa – sem enn er í „hommastríði“ og finnst allt húllumhæið í kringum lagið sprenghlægilegt.“ Hér að neðan má heyra lagið Brjálað stuðlag! sem er komið í spilun. Óhætt er að segja að Sólmundur nái vel að herma eftir Gylfa. Jakob Frímann Magnússon, Bjartmar Guðlaugsson og Mugison syngja einnig í laginu.