Birta myndir af meintum nauðgurum á nýjan leik

Svo virðist sem fjölmiðlaumfjöllun undanfarinna vikna um barnaníðinga hafi blásið lífi í hópinn „Við viljum nöfn og myndir af dæmdum barnaníðingum" á Facebook.

Hópurinn var stofnaður í maí 2010 og vakti mikla athygli. Á tímabili voru meðlimir um 13 þúsund en eru þegar þetta er skrifað 526. Á einni viku hafa verið birtar átta myndir af karlmönnum sem meðlimir hópsins segja vera af dæmdum barnaníðingum. Myndbirtingunum fylgir í flestum tilfellum tengill á frétt eða dómsúrskurð vegna nauðgunar eða barnaníðs. Þá kemur nafn mannanna fram og í sumum tilfellum heimilisfang.

Einn meðlimur hópsins veltir upp spurningu um framtak hópsins. Hann segir þessa menn einnig eiga fjölskyldur og minnir á að þeir séu líka manneskjur. „Þeir eru bara veikir og það þarf að lækna þá...ekki tala ljótt um þá," skrifar sá við litlar undirtektir annarra í hópnum:

„Veikir hvað????? Í tillanum!!! Skera undan þeim,málið leyst!"

„Afhverju ekki að vara aðra við,einhvern veginn þarf að stoppa þá,ekki gera þeir það sjálfir!"

„held þú ættir frekar að reyna sitja þig í spor þeirra sem hafa lent í kynferðislegu ofbeldi,þótt þeir eiga fjölskyldur þá eigum við börn,sem þarf að vara við svona mönnum eins og þessum."

Meðlimir hópsins fagna því að virkni sé komin í hópinn á nýjan leik. Skúli Steinn Vilbergsson, stofnandi hópsins, sagði eftirfarandi í viðtali við Pressuna í maí 2010 aðspurður um hópinn:

„Það verður enginn rógburður liðinn þarna og honum verður umsvifalaust eytt. Það er ekkert mál. Þetta kemur sér ekki illa fyrir neinn nema sjálfa afbrotamennina sem um ræðir," sagði Skúli Steinn á sínum tíma.

Þá sagði Björgvin Björgvinsson, yfirmaður kynferðisbrotadeildar lögreglunnar í sama viðtali, að lögreglan myndi líkast til ekkert aðhafast í málinu nema lögð yrði fram kæra.