BAFTA-tilnefningum Íslendinga fjölgar

Stuttmyndin Tumult, með Ingvari E-Sigurðssyni, Gísla Erni Garðarssyni og Ívari Erni Sverrissyni, hefur verið tilnefnd til bresku kvikmyndaverðlaunanna BAFTA sem besta stuttmyndin. Af fimm myndum sem tilnefndar eru eiga Íslendingar fulltrúa í tveimur þeirra.

Í myndinni Tumult, sem leikstýrð er af Johnny Barrington, segir frá hópi norrænna víkinga sem rekur á framandi slóðir eftir blóðugan bardaga. Ingvar, sem fer með hlutverk foringjans í myndinni, er illa særður og við það að afsala valdinu til sonar síns þegar óvænta gesti ber að garði.

"Þetta er skip á hjólum," segir Gísli Örn þar sem þeir félagar sjá rútu af ferðamönnum koma aðvífandi. Stiklu úr myndinni má sjá hér að neðan.

Good Night, stuttmynd leikstjórans Evu Sigurðardóttur, er einnig tilnefnd til sömu verðlauna eins og fjallað hefur verið um í íslenskum fjölmiðlum. Í myndinni ákveða tvær 14 ára stúlkur að hætta að lifa lífinu sem saklausar unglingsstelpur. Þær halda út á lífið í vafasömum klæðnaði og lenda í erfiðum aðstæðum.

Stiklu úr myndinni má sjá hér að neðan. BAFTA-verðlaunin verða afhent þann 10. febrúar.