Skyggnilýsingarfundur í Hamraskóla - Óttast ekki ærsladraug

Foreldrafélag Hamraskóla í Reykjavík safnar nú fé til kaupa á tólf spjaldtölvum fyrir skólann og hefur blásið til óvenjulegrar fjáröflunar. Þórhallur Guðmundsson miðill, verður með skyggnilýsingarfund í skólanum, og allur aðgangseyrir rennur í tölvusjóðinn.

Sveinn Snorri Sighvatsson, formaður foreldrafélagsins, segir skólann búa við lélegan tölvukost og því var ákveðið að safna fé til tölvukaupa. Hamraskóli sé í samstarfi við Ardleigh Green-grunnskólann í London, og tilkoma spjaldtölva myndi auka enn á hið góða samstarf.

„Skyggnilýsingarfundir hafa alltaf trekkt fólk að og vekja upp ákveðna forvitni meðal fólks. Því fannst okkur þetta sniðug leið til að afla fjár. Ég vann með Þórhalli á Bylgjunni í mörg ár og prófaði því bara að hringja í kallinn og spyrja hann hvort hann væri ekki til í þetta."

Að sögn Sveins er fundurinn opinn öllum, bæði börnum og fullorðnum, og viðbrögðin í hverfinu hafa verið góð. „Ég hef til dæmis heyrt af nokkrum saumaklúbbum sem ætla að mæta," bætir hann við, og segist ekki óttast að púkar eða ærsladraugar taki sér bólfestu í Hamraskóla í kjölfar fundarins.

„Nei ég hugsa að andinn verði bara betri eftir fundinn. Það er alltaf góður andi í kringum Þórhall miðil."