Vélsleðamaður fluttur með þyrlu Landhelgisgæslunnar

Þyrla Landhelgisgæslunnar var kölluð út rúmlega fjögur í dag eftir að tilkynnt var til Neyðarlínunnar um vélsleðaslys í Veiðivötnum.

Hinn slasaði er talinn handleggsbrotinn samkvæmt tilkynningu frá Landhelgisgæslunni, auk annarra áverka, en ekki í lífshættu.

Þar sem um langa vegaleið er fyrir björgunarsveitir að fara var ákveðið að kalla til þyrlu gæslunnar og fór hún í loftið um tíu mínútum fyrir fimm.

Komið var á staðinn um hálf sex og er nú unnið að því að flytja hinn slasaða um borð í þyrluna. Hann verður svo fluttur á Landspítalann.