Aldrei fleiri hafa leitað til Barnahúss en nú í janúar

Eftirspurn eftir viðtölum og þjónustu í Barnahúsi hefur aldrei verið meiri en nú í janúar. Ólöf Ásta Farestveit, forsvarskona Barnahúss, segir vissulega nokkrar holskeflur hafa komið undanfarin ár, þegar umræður um kynferðisbrot gegn börnum standa sem hæst, en að aldrei hafi aðsóknin þó verið jafn mikil og nú.

„Við erum gjörsamlega á haus, vægt til orða tekið," segir Ólöf. „Það er fullt af börnum sem segja frá ofbeldi í kjölfar svona umræðu, líka þau sem hafa verið við það að segja frá en eru að kikna undan álaginu."

Ólöf segir einnig að áhyggjufullir foreldrar hafi hringt óvenjumikið í Barnahús undanfarnar tvær vikur, sem og skólayfirvöld. „Það er alltaf haft mikið samband við okkur frá skólunum, en það er einstaklega mikið núna," segir Ólöf og bætir við að þó mikið af nýjum málum sé að koma fram ýfi umræðan einnig upp gömul sár hjá börnum sem hafa lokið meðferð og þurfa á ný að snúa sér til Barnahúss.

„Umræðan hefur alveg svakaleg áhrif," segir hún. „Ég hef aldrei upplifað annað eins, síminn stoppar ekki."

Ólöf segir að símtölum hafi tekið að fjölga um tveimur dögum eftir að þáttur Kastljóss um Karl Vigni Þorsteinsson fór í loftið, þann 7. janúar. En nú fyrst séu þyngri málin að hrannast inn, þar sem þau þurfa fyrst að fara í gegnum barnaverndarnefndir sem meta hvort ástæða sé til að senda börnin í könnunarviðtöl í Barnahúsi, sem og greinargerðir frá dómstólum.

Þótt áhrif umræðunnar séu vissulega jákvæð annar Barnahús ekki eftirspurn þegar svo gríðarlegur fjöldi sækist eftir þjónustu þaðan. Fjórir sérfræðingar vinna nú þar í fullri vinnu en húsinu berast á bilinu 280 til 300 mál á ári, sem aukast stöðugt. Ekki hefur verið tekinn saman heildarfjöldi í janúar en Ólöf segir aukninguna tvímælalaust töluverða. „Húsnæðið okkar er löngu sprungið og málafjöldinn löngu kominn yfir það sem Barnahúsi var upphaflega ætlað að sinna," segir hún.

„Það þarf fleira starfsfólk og stærra húsnæði, því þetta gerir það að verkum að börnin komast ekki eins fljótt að.