Ein milljón til Barnaspítalans

Fréttavefurinn Vísir hefur gefið Barnaspítala Hringsins veglega peningagjöf að upphæð einni milljón króna.

Fólkið á Facebook réð því hversu há upphæðin varð. Fyrir hvert „like“ sem Facebook-síða Vísis fékk söfnuðust 25 krónur og á endanum nam upphæðin einni milljón króna.

Mikael Torfason, aðalritstjóri 365, og Ólafur Stephensen, ritstjóri Fréttablaðins, afhentu Valgerði Einarsdóttur, formanni kvenfélagsins Hringsins, og Sjöfn Hjálmarsdóttur, varaformanni, peningagjöfina, sem rennur beint í Barnaspítalasjóðinn.

„Þetta er frábært. Við þökkum innilega fyrir flott framtak. Við erum stundum orðlaus yfir velvildinni í okkar garð,“ sagði Valgerður við afhendinguna. „Þetta á eftir að koma að góðum notum.“

Hringurinn, sem vinnur að líknar- og mannúðarmálum fagnar 110 ára afmæli 26. janúar næstkomandi. „Við höldum alltaf upp á afmælin okkar með afmælissúkkulaði fyrir félagskonur en kannski verður eitthvað meira gert í tilefni dagsins,“ sagði Sjöfn.