Forynja hannar á börn

Ný barnafatalína og heimilislína eru væntanlegar frá Söru Maríu Forynju á næstu dögum. Í dag opnar Sara María einnig sýningu á silkikjólum í Kirsuberjatrénu.

Ég tók mér frí í eitt og hálft ár og notaði þann tíma til að gera ýmislegt skemmtilegt,“ segir Sara María, fatahönnuður Forynju, en ný barnafatalína er væntanleg frá henni á næstu dögum undir merkjum Forynju.

Barnafatalínan inniheldur buxur og peysur, boli, pils, kjóla og samfestinga, í afgerandi hressilegum litum og með áþrykktu munstri sem einkennir hönnun Söru Maríu. Barnafötin höfðu lengi verið á dagskrá en aldrei unnist tími til að sinna þeim segir Sara.

„Gegnum árin hafði ég gert eina og eina barnaflík og langaði alltaf til að gera meira. Í fríinu gat ég spólað til baka, laus við stressið sem fylgdi því að framleiða einungis það sem bráðvantaði í búðina, og gert það sem mig langaði til að gera,“ segir Sara. „Þá fór ég að gera barnafötin. Ég er að vinna í línunni á fullu þessa dagana. Peysurnar eru komnar í sölu og svo fer þetta allt í gang eftir helgina.“

Sara nýtti fríið til fleiri hluta en hönnun barnafatalínunnar. Hún sendir einnig frá sér heimilislínu undir merkjum Forynju sem inniheldur meðal annars, flauelspúða, viskustykki og borðtuskur með áprentuðum myndum sem Sara hefur tekið sjálf.

Þá hefur Sara María einnig bæst í hóp hönnuðanna í Kirsuberjatrénu og í dag klukkan 17 verður opnuð samsýning hennar og Kolbrúnar Ýrar fatahönnuðar, þar sem Sara sýnir glænýja silkikjóla.

„Við Elva Ósk Ólafsdóttir leikkona höfum verið að vinna saman silkikjóla með áprentuðum myndum sem Elva hefur tekið sjálf. Hún hefur alltaf haft mikinn áhuga á hafinu og myndirnar eru af ígulkerum og fleiru sem tengist sjónum. Kolbrún sýnir nýjustu hálsmenalínu sína, Elsk. Það eru því margir skemmtilegir hlutir í gangi núna sem er æðislegt. Ég er mjög spennt.“