300 erlendir blaðamenn sækja Airwaves í ár

Mikill fjöldi erlendra blaðamanna mun sækja Ísland heim í tengslum við tónlistarhátíðina Iceland Airwaves sem fram fer dagana 30. október til 3. nóvember. Þeirra á meðal er fjögurra manna tökuteymi frá sjónvarpsstöðinni Fox News.

„Þetta er í allt um 300 blaðamenn og um 150 einstaklingar sem starfa innan tónlistargeirans. Einnig er von á bókurum frá tónlistarhátíðum á borð við Big Sound í Ástralíu, Eurosonic í Hollandi og Reading Festival og útsendurum á vegum plötufyrirtækja,“ segir Kamilla Ingibergsdóttir, kynningastjóri Iceland Airwaves.

Meðal annars er von á fjölmiðlafólki frá CNN, BBC, MTV, CBS, Fox News, Rolling Stone, Vice, DR1 og Der Spiegel til landsins í tengslum við hátíðina.

Þetta er í fyrsta sinn sem starfsfólk bandarísku sjónvarpsstöðvanna CNN og Fox News sækir hátíðina. „Fox sendir fjögurra manna tökuteymi hingað og mér skilst að CNN ætli að gera heilan þátt um Reykjavík þar sem Airwaves verður í brennidepli.“

Sérstök dagskrá hefur verið skipulögð fyrir hið erlenda fjölmiðlafólk á meðan á dvöl þess stendur. „Aðalatriðið er þó auðvitað dagskráin á Airwaves,“ segir Kamilla. Uppselt varð á tónlistarhátíðina í september en utandagskrárliðir hennar hafa aldrei verið fleiri en í ár.