Bubbi mun rokka með Jötnunum

„Við erum búnir að æfa þetta killer-prógram og við ætlum að rokka,“ segir Bubbi Morthens um samstarf sitt við Jötnana. Bubbi og Jötnarnir áttu að koma fram á tónleikahátíðinni Rokkjötnar í Kaplakrika en henni var skyndilega aflýst, mörgum rokkaranum til mikils ama.

Hljómsveitina Jötna skipa landsþekktir og þrautreyndir rokkarar ásamt Bubba, en hljómsveitin hefur undanfarið æft þekktustu og vinsælustu rokklög Bubba. „Það eru 99,9 prósent líkur á því að við höldum tónleika á næstu vikum,“ segir Bubbi um framhaldið.

Margar af vinsælustu rokksveitum landsins áttu að stíga á svið í Kaplakrika. „Þetta er mikill bömmer og ég vona bara að þeir sem lögðu upp með þetta séu ekki að tapa miklum peningum, það væri alveg hræðilegt en svona er bara Ísland í dag. Lífið er ekki alltaf dans á rósum,“ bætir Bubbi við.

„Þjóðin er föst inni á baðherbergi, upp á vigt og er greinilega að verða mýkri, það skýrir sig sjálft,“ svarar Bubbi að lokum, þegar spurt er um hvort þjóðin sé að verða mýkri og hvort áhugi þjóðarinnar á rokki sé að minnka.

Bubbi er byrjaður að leggja drög að nýrri plötu sem mun fara í vinnslu á næstu mánuðum.