Lúðraþytur og popp í Þorlákshöfn

„Það verður mikið um að vera hjá okkur og íþróttahúsið mun hýsa sannkallaða tónlistarveislu,“ segir Ása Berglind Hjálmarsdóttir framkvæmdastjóri um landsmót Sambands íslenskra lúðrasveita sem fram fer í Þorlákshöfn um helgina.

Þar koma fram Jónas Sig, 200.000 naglbítar og Fjallabræður ásamt Sverri Bergmann. Lúðrasveitir landsins koma fram með áðurnefndum listamönnum sem allir hafa áður starfað með lúðrasveitum.

„Við erum búin að skipta öllum lúðrasveitum landsins í þrjár 65 manna sveitir. Þá spilar ein af lúðrasveitunum þremur með Jónasi Sig, önnur með Naglbítunum og þriðja með Fjallabræðrum,“ segir Ása Berglind um fyrirkomulagið. Í lok tónleikanna spila svo saman allir þeir sem koma fram.

Líklegt er að margt verði um manninn á landsmótinu. „Listamennirnir gista í skólanum en ég geri ráð fyrir að eitthvað af fólki dvelji á tjaldstæðinu,“ bætir Ása Berglind við.

Ár er síðan Lúðrasveit Þorlákshafnar lék inn á plötu með Jónasi Sig og kom fram á þrennum tónleikum í reiðhöllinni í Þorlákshöfn. „Lúðrasveit Þorlákshafnar er stór og kraftmikil og endurspeglar mikið og blómlegt tónlistarlíf í kaupstaðnum.“

Vert er að geta þess að Þorlákshöfn er í einungis þrjátíu mínútna fjarlægð frá höfuðborginni.

Rás 2 verður á staðnum og hljóðritar tónleikana. Miðasala er á midakaup.is.