Fjárfestum í menntun

Í nýjum aðalnámskrám leik-, grunn- og framhaldsskóla er lögð áhersla á skóla fyrir alla og heildstæða menntastefnu með skýrum skilum á milli skólastiga. Þar kemur einnig fram mikilvægi sveigjanleika á milli skólastiga þannig að nemendur hafi tækifæri til að sinna námi miðað við eigin námstöðu og þroska. Nemendur eiga jafnframt að hafa möguleika á að fara á milli skólastiga og/eða stunda nám á tveimur skólastigum samhliða.

Lögð er áhersla á fjölbreytt viðfangsefni og starfshætti til að koma til móts við mismunandi þarfir ólíkra einstaklinga og stuðla að alhliða þroska, velferð og menntun hvers og eins.

Íslensk menntastefna felst í því að:

koma til móts við margbreytilegar þarfir einstaklinga,

hver nemandi fái nám miðað við þroska og getu,

nám og daglegt líf nemenda einkennist af jafnrétti, lýðræði, sjálfbærni, sköpun og heilbrigði og velferð,

sveigjanleiki sé í náminu, nemendur geti breytt um námsleiðir hvenær sem er eða tekið hlé á námi sínu,

hver og einn fái tækifæri til að stunda nám alla ævi.

Leik-, grunn- og framhaldsskólar á Íslandi í dag starfa í anda þessarar stefnu og leita margvíslegra leiða til þess þrátt fyrir töluverðan niðurskurð fjármagns allan síðasta áratug.

Vinnum saman

Umræða á opinberum vettvangi er lituð af því að íslenska skólakerfið sé of dýrt og að framleiðniaukning sé ekki nægjanleg. Allir vilja gott menntakerfi. Foreldrar, ömmur og afar vilja það besta fyrir börnin sín. Neikvæð umræða um brottfall, framleiðniaukningu, óhagkvæmar rekstrareiningar og of há fjárframlög hefur áhrif á ímynd og upplifun allra sem koma að skólunum.

Vænlegra er að ræða um þann góða árangur sem næst og alla sigrana sem unnir eru á hverjum degi í skólum landsins. Leik- og grunnskólar á Íslandi eru dýrir vegna þess að landið er stórt og strjálbýlt og miklar kröfur gerðar til alls umbúnaðar þeirra.

Vinnum í lausnum og tökum okkur Finna til fyrirmyndar en þeir byggðu menntakerfi sitt upp með samvinnu, lausnamiðaðir og einhuga. Lykilhugsunin hjá þeim er að það séu margar leiðir til að byggja upp árangursríkt menntakerfi. Þeir lögðu áherslu á að meta til jafns árangur og ástundun nemenda og að mæla umbætur í námi og kennslu og árangur nemenda með alþjóðlegum stöðlum.

Áhersla var lögð á fría menntun fyrir alla frá leikskóla til háskóla þar sem ríki og sveitarfélög bera kostnaðinn að mestu. Þá lögðu þeir ríka áherslu á gæði kennaramenntunar þar sem jöfn áhersla er á fagþekkingu og kennslufræði, sérstök áhersla var lögð á stærðfræði, raungreinar og lestur og að byggja upp fagmennsku kennara og skólastjórnenda.

Nýleg lög og námskrár leik-, grunn- og framhaldsskóla bjóða upp á margvísleg tækifæri til að byggja upp menntakerfi með góða og margbreytilega skóla og víðtæk sátt er um þá menntastefnu sem þar kemur fram.

Það tók Finna tvo til þrjá áratugi að ná árangri og þeir gáfust ekki upp. Gefum okkur tíma og vinnum saman, leitum lausna og byggjum einhuga upp árangursríkt menntakerfi fyrir alla. Fjárfestum í menntun, allir munu njóta góðs af arðinum.