Live-tónlist í bíósalnum á RIFF í kvöld

„Við erum búin að vera að undirbúa þetta lengi og erum spennt fyrir kvöldinu,“ segir Guðmundur Óskar, bassaleikari hljómsveitarinnar Hjaltalín sem flytur tónlist sína á frumsýningu myndarinnar Days of Gray í Gamla-bíói í kvöld. Frumsýningin er óvenjuleg að því leytinu til að kvikmyndin sem um ræðir er þögul, og tónlist Hjaltalín kemur í stað díalogs.

Þetta er fyrsta kvikmynd bandaríska leikstjórans Ani Simon-Kennedy í fullri lengd en hvatinn að gerð hennar var einmitt tónlist Hjaltalín, sem leikstjórinn sá á tónleikum í Tékklandi.

„Þetta er dálítið sérstakt verkefni vegna þess að þetta eru í rauninni bara áttatíu mínútur af tónlist - það er líka svo gaman hvernig samstarfið kom til. Þetta er ekki hefðbundin gerð tónlistar við kvikmyndir heldur semur leikstjórinn handritið eftir að hafa séð okkur spila,“ útskýrir Guðmundur.

„Um leið og var búið að skjóta myndina, í fyrra, tókum við tíu daga þar sem við gerðum þessa tónlist og kláruðum myndina,“ segir Guðmundur jafnframt.

Hjaltalín settu upp forsýningu verkinu á Iceland Airwaves í fyrra sem einhverjir hafa eflaust séð.

„Síðan þá er búið að breyta myndinni aðeins og svo vantar tvo meðlimi hljómsveitarinnar sem eru í útlöndum, þau Rebekku og Viktor,“ bætir hann við.

„Þannig að við þurfum að sníða stakk eftir vexti, og fáum til að mynda Bjarna Frímann inn sem staðgengil Viktors á fiðlu.“

„Svo er að koma út plata með þessari tónlist í haust. Við höfum valið lög úr myndinni og sungið yfir önnur,“ segir Guðmundur.

Days of Gray gerist í fjarlægri framtíð og segir frá einstakri vináttu drengs og stúlku. Myndin er laus við öll samtöl og því spilar tónlist hljómsveitarinnar veigamikið hlutverk í henni