365 verk á jafnmörgum dögum

„Það sem mér finnst merkilegt er hvað þetta tengir saman marga póla í lífinu. Þetta fer víða og þannig getur fólk séð hverjir eru að gera myndlist og svo kemur listin til með að fara á staði þar sem hún er ekki venjulega á boðstólnum,“ segir Lind Völundardóttir, einn aðstandenda almanaksins List í 365 daga.

Almanakið kom út í fyrsta sinn í september og spannar almanaksárið 2014.

Dagatalið inniheldur verk 365 myndlistarmanna, hönnuða, skálda, ljósmyndara, kvikmyndagerðarmanna og fleiri listamanna sem allir eru tengdir íslensku listalífi á einn eða annan hátt.

Hverjum listamanni verður úthlutað einni síðu, eða einum degi, í almanakinu þar sem verk hans er til sýnis.

List í 365 daga má líkja við listviðburð sem stendur allan ársins hring, þar sem hægt er að njóta þess að hafa daglega nýtt listaverk fyrir augum.

Markmiðið er að sýna þá grósku og gerjun sem á sér stað í skapandi greinum hér á landi.

Stefnt er að því gera útgáfu almanaksins að árlegum viðburði.