Amanda Bynes greind með geðklofa

Leikkonan Amanda Bynes er sögð á batavegi eftir að hafa verið nauðungarvistuð á geðdeild fyrr í sumar. Bynes var greind með geðklofa og geðhvörf og mun dvelja á spítala til ársins 2015.

Bynes var handekin og nauðungarvistuð á geðdeild eftir að hafa kveikt bál í innkeyrslu húss í Thousand Oaks í Kaliforníu, en leikkonan er uppalin í bænum. Hún hafði áður verið handtekin fyrir að kasta hasspípu, sem búin var til úr gleri, út um glugga á blokkaríbúð sinni í New York.

„Amanda nýtur nú sérfræðiþekkingar og aðstoðar lækna á UCLA-háskólasjúkrahúsinu í Los Angeles. Henni vegnar vel og tekur stöðugum framförum,“ sagði í tilkynningu sem foreldrar Bynes sendu til fjölmiðla fyrir stuttu.

Bynes hóf leiklistarferil sinn aðeins sjö ára gömul. Hún kom meðal annars fram í sjónvarpsþáttunum Figure It Out og What I Like About You. Að auki stýrði hún gamanþættinum The Amanda Show.