Málar dýr og drottningar

Sigrún Rós Sigurðardóttir húðflúrari málar og spreyjar einstakar myndir í frítíma sínum og rekur húðlflúrstofuna Bleksmiðjuna ásamt eiginmanninum.

Ég hef alltaf verið að mála og teikna en ég er ekki mikið að horfa á sjónvarp og svoleiðis svo ég geri ekki mikið annað en að teikna í frítíma mínum,“ segir Sigrún Rós Sigurðardóttir hlæjandi. „Við maðurinn minn opnuðum tattústofuna Bleksmiðjuna fyrir þremur árum svo það hefur hentað mér vel að vera frjálsari í listinni.“

Sigrún Rós hefur starfað við húðflúrun undanfarin sex ár og segist sækja mikinn innblástur í ævintýraleg dýr eða drottningar í myndirnar sínar. „Ég tússa eða mála verkin með vatnslitum og svo er ég að spreyja eins konar litla kökudúka. Þetta kemur voðalega skemmtilega út,“ útskýrir hún. 

Sigrún Rós vinnur að listinni í bílskúrnum heima en fram undan er sýning á verkunum hennar á Energyu í Smáralind. Hægt er að skoða verkin nánar á Facebook-síðunni Sigrún Rós Artwork.