Dúettinn Eva tjáir sig með tónlist

„Við höfðum báðar gefið upp barnæskdrauminn um að vera söngkonur og fórum í leiklistina,“ segir Jóhanna Vala Höskuldsdóttir, annar stofnenda hljómsveitarinnar Evu. Hún skipar sveitina ásamt Sigríði Eir Zophoníasardóttur.

„Við kynntumst í Listaháskólanum og fundum eiginlega tónlistina okkar þar á óvæntan hátt í gegnum verkfæri leikhússins. Sem konur og lesbíur í nútímasamfélagi höfum við margt til málanna að leggja og ákváðum að prófa að tjá okkur í gegn um tónlistina,“ bætir Vala við.

Meðlimir Evu hafa tekið að sér nokkur verkefni innan leiklistarinnar á næstunni. „Við erum tónlistarstjórar í afmælisuppfærslu Leikfélags Akureyrar á Gullna hliðinu og svo erum við líka að þróa söngleik fyrir Borgarleikhúsið,“ segir Jóhanna Vala.

Báðar áttu þær kærustu að nafni Eva þegar sveitin var stofnuð og varð það nafn því fyrir valinu þegar nefna átti sveitina.

Þær leggja metnað í að semja tónlist og texta um litlu hlutina í lífinu. „Við viljum setja litlu hlutina í stærra samhengi eins og til dæmis viðbein og nef,“ útskýrir Jóhanna Vala, en vinsælasta lag sveitarinnar heitir einmitt Viðbein og er ástarlag.

Þær koma fram á tónleikum á Rósenberg þann 9. október næstkomandi ásamt góðum gestum.