Módelfitness fyrir 100 þúsund kall

Hinn 22 ára Venný Hönnudóttir ákvað að prófa módelfitness í fyrsta sinn í fyrra og hefur hún keppt á einu móti.

„Ég var að komast upp úr veikindum og langaði að sjá hvað ég gæti. Mig langaði að hafa markmið,“ segir Venný, spurð hvers vegna hún ákvað að hella sér út í módelfitness.

Í megindráttum eru áherslur dómara í þessari nýju keppnisgrein þær að mun minni áhersla er lögð á vöðvamassa og skurði og frekar er horft til fegurðar. Byrjað var að keppa í módelfitness hérlendis árið 2006 og skemmst er að minnast þess að Margrét Edda Gnarr varð heimsmeistari í módelfitness í Úkraínu í síðasta mánuði.

Venný mælir með því að fólk prófi fitness ef það fer í það á réttum forsendum. „Þetta er rosalega stíft prógram. Maður er fyrst og fremst að keppa við sjálfan sig. Þetta er mikið álag á líkamann og mér finnst mikilvægt að vera með þjálfara sem passar upp á að fólk fari ekki í gígantískar öfgar.“

Kostnaðurinn við að gerast fitness-keppandi er misjafn og í tilfelli Vennýjar var hann umtalsverður. „Byrjunarkostnaðurinn er dýr en til hliðsjónar dettur ýmislegt út á móti.“

Eitthvað er um að keppendur sæki um auglýsingastyrki í tengslum við fitnesskeppnir en Venný fór ekki þá leið: „Þetta var fyrsta mótið mitt og ég ákvað að gera þetta bara fyrir sjálfa mig.“

Venný og fitness-kostnaðurinn:

Einkaþjálfari  30 þúsund kr.

„Ég fór í einkaþjálfun hjá Freyju Sigurðardóttur og það voru 30 þúsund krónur á mánuði. Það eru samt ekki margir sem eru í einkaþjálfun. Margir eru í fjarþjálfun og þá kostar það kannski 12 til 15 þúsund krónur.“

Fæðubótarefni 20 þúsund kr.

„Ef fólk er alveg nýtt í þessu er fæðubótarkostnaður í byrjun svolítið mikill. Einn próteindunkur kostar svona 8-10 þúsund en það er reyndar misjafnt eftir tegundum. Svo er misjafnt hvað fólk er að taka aukalega eins og vítamín, glútamín, magnesíum, kreatín og fleira.“

Mánaðarleg matarkaup  25-35 þúsund kr.

„Maður þarf að borða kjúkling, eggjahvítur, grænmeti, hafragraut og fleira. Ég bjó til eigið hrökkbrauð og setti kotasælu ofan á. Mánaðarinnkaupin voru 25-35 þúsund fyrir utan fæðubótarefni. Á móti kemur að maður er ekki að kaupa sér skyndibita og fær sér ekki Mars á kassanum í Bónus þegar maður fer að versla. Svo er ekkert djamm um helgar. Það er svo margt sem kemur á móti varðandi kostnað.“

Leigja bíkiní  15 þúsund kr.

„Til að geta keppt í módelfitness þurfti ég bíkiní. Annaðhvort láta menn sauma á sig eða menn leigja notuð bíkiní og í mínu tilfelli leigði ég á 15 þúsund krónur.“

Brúnkukrem 4 þúsund kr.

„Ég keypti mér dollu á 4 þúsund krónur, brúnkukrem fyrir mótið. Annars er örugglega breytilegt hvað þetta kostar.“

Keppnisgjald  5 þúsund kr.

„Þetta kostaði í mesta lagi 5 þúsund krónur.“

Förðun  4 þúsund kr.

„Förðun fyrir mót kostar í kringum 4 þúsund en vinkona mín farðaði mig fyrir mótið, þannig að ég fékk góðan „díl“.“