Arnar Tómasson: Tilvalið að gefa gömlu skærin

„Þetta er samvinnuverkefni Meistarafélags hársnyrta og Intercoiffure, alþjóðlegra samtaka sem hafa stofnað hárgreiðsluskóla hér og þar um heiminn, meðal annars þrjá í Brasilíu, einn í Rúmeníu og núna einn í Suður-Afríku. Mér þótti tilvalið að fá íslenskt hárgreiðslufólk til að gefa gömlu skærin og senda þau út því unga fólkið þarf verkfæri til að geta sinnt iðju sinni,“ segir Arnar Tómasson, hárgreiðslumeistari og varaformaður beggja samtakanna. Hann tók á móti gömlum skærum sem send voru út til Suður-Afríku í gærmorgun. Þar verða þau afhent suðurafrískum götubörnum sem hafa hug á að nema háriðn.

„Skólarnir er ætlaðir götubörnum sem hafa komist í kast við lögin. Intercoiffure gerir þeim kleift að læra iðn og þannig finna sér starf til að hafa í sig og á,“ segir Arnar sem hefur starfað sem hárgreiðslumaður frá árinu 1987.

Söfnunin hófst á mánudaginn fyrir viku og lauk í gær. „Meðlimir beggja félaga skiluðu skærum inn til mín, þau voru síðan send til Danmerkur í morgun [gær] og fara þaðan áfram til Suður-Afríku. Þar verða skærin yfirfarin, brýnd og gerð nothæf að nýju. Það muna flestir eftir sínum fyrstu skærum og það er gaman að geta gefið áfram.“

Aðspurður segist Arnar ekki hafa getað látið fyrstu skærin sín af hendi til verkefnisins. „Meistari minn gaf mér mín fyrstu skæri, en því miður á ég þau ekki lengur. Það var brotist inn á stofuna mína fyrir þremur árum síðan og öllu rænt, þar á meðal umræddum skærum,“ segir hann að lokum.