Leaves snýr aftur með nýja plötu

„Við byrjuðum að taka upp plötuna árið 2010 en hún hefur þó ekki verið í vinnslu stanslaust síðan þá,“ segir Arnar Guðjónsson, söngvari og gítarleikari hljómsveitarinnar Leaves, um nýjustu plötu sveitarinnar. Platan heitir See You In The Afterglow og er gefin út af Record Records .

„Það hafa að jafnaði liðið þrjú til fjögur ár á milli platna hjá okkur en við erum mjög ánægðir með nýju plötuna,“ bætir Arnar við.

„Það hafa orðið mannabreytingar innan hljómsveitarinnar, Elís Pétursson tók við bassanum af Halli Hallssyni og svo gekk Kjartan F. Ólafsson hljómborðsleikari til liðs við okkur í kringum síðustu útgáfutónleika.“

Hljómsveitin vakti mikla athygli með fyrstu plötu sinni Breathe sem kom út um allan heim á árunum 2002 og 2003. „Við spiluðum út um allt á þessum tíma, komum meðal annars fram á Glastonbury-hátíðinni árið 2002 og túruðum með hljómsveitinni Stereophonics,“ segir hann. Platan komst á árslista Rolling Stone tímaritsins yfir bestu plötur þessa árs.

Leaves hefur komið reglulega fram upp á síðkastið en ætlar sér að vera mun sjáanlegri á næstunni. „Við erum að spila á Iceland Airwaves og svo verðum við líka að spila á fullt af off-venue viðburðum.“

Ocean er nýtt smáskífulag frá sveitinni en hægt er að nálgast það á vefsíðu Record Records.