Sálin í fyrsta sinn í Hörpu

„Það verður öllu tjaldað til á þessum miklu tónleikum,“ segir Stefán Hilmarsson, söngvari hljómsveitarinnar Sálin hans Jóns míns, um tónleikana. Sálin fagnar í ár 25 ára afmæli og af því tilefni stendur sveitin fyrir stórtónleikum í Hörpu þann 9. nóvember.

„Okkur til fulltingis verða valinkunnir aðstoðarmenn, strengjasveit, blásarar, bakraddir og fleiri listamenn,“ bætir Stefán við.

Þetta er í fyrsta skiptið sem hljómsveitin heldur tónleika í Hörpu og verður þar án efa mikið um dýrðir. Tónleikadagskráin samanstendur af þekktustu lögum sveitarinnar í gegnum árin, auk nokkurra laga sem sjaldan heyrast. Þá verða eitt til tvö ný lög frumflutt í Eldborginni.

Þess er einnig vert að geta að í tilefni afmælisins hafa forsvarsmenn Hamborgarafabrikkunnar sett á matseðil sinn hamborgara tileinkaðan Sálinni. Sá ber nafnið Draumurinn og þykir einkar veglegur og ljúffengur.

Miðasala á tónleikana fer fram á harpa.is.