Elskaði öll lögin sem hann spilaði

„Þetta var bara komið nóg í bili,“ segir Kristján Kristjánsson, KK, sem hætti í gær með útvarpsþátt sinn Morgunstund með KK. Þátturinn hefur verið á dagskrá Rásar 1 í fimm ár við miklar vinsældir.

„Það er búið að vera svo mikið að gera hjá mér í tónlistinni undanfarið og mörg verkefni sem bíða,“ segir KK um ástæðu brotthvarfsins. „Það eru líka ýmis verkefni sem ég ætlaði alltaf að vinna í en maður gerir það ekki þegar maður er á fullu í öðru. Morgunstund var full vinna og rúmlega það.“

Aðspurður segist hann hafa eytt miklum tíma í að finna hvert einasta lag þáttarins. „Öll lögin sem ég spila eru lög sem ég elska. Til að finna eitt svona lag þarftu að hlusta á fleiri hundruð lög. Svo þarftu að finna upplýsingar um lagið og það fer mikil vinna í það líka.“

Í lokaþættinum í gær notaði KK tækifærið og spilaði í fyrsta sinn nokkur lög á gítarinn sinn. Hann ætlar ekki að kveðja Ríkisútvarpið fyrir fullt og allt því hann býst við að hafa umsjón með nýjum útvarpsþætti einu sinni í viku.

Post by Lífið á Visir.is.