Prinsessan í Fjallabræðrum

Unnur Birna Bassadóttir leikur, syngur og spilar í Jeppi á Fjalli í Borgarleikhúsinu sem frumsýnt verður 4. október.

„Ég fæ að leika fógetafrúna og er að spila og syngja í Jeppa á Fjalli. Það er ekki amalegt að fá að leika á móti Ingvari,“ segir Unnur Birna Bassadóttir, söng- og tónlistarkona.

„Draumurinn minn var alltaf að verða bíómyndaleikkona. Reyndar flugmaður líka en það er víst ekki að fara gerast úr þessu. Það er gott að hafa einhverja drauma,“ segir hún flissandi. Unnur Birna er fjölhæf tónlistarkona og virðist fátt vefjast fyrir henni þegar kemur að hljóðfærum og tónlist.

Í Jeppa á Fjalli syngur hún og spilar á píanó, bassa, orgel, fiðlu og klukkuspil en tónlistin er eftir Megas og Braga Valdimar. Jeppi á Fjalli er klassískt verk sem fjallar um alkóhólisma og vítahring hans.

Unnur Birna hefur áður unnið í leikhúsi en tónlistina segir hún hafa fylgt sér alla tíð. „Ég svaf í hljómborðstöskunni hjá mömmu og pabba þegar þau voru á hljómsveitaræfingum. Svo byrjaði ég í kór þegar ég var þriggja ára þegar pabbi var með Snælandsskólakórinn. Í dag reka foreldar mínir tónlistarskólann Tónræktina á Akureyri og ég hef því haft gott bakland.“

Unnur Birna æfði djasssöng og tók kennsluréttindin í FÍH. Verkefnin sem hún hefur tekið að sér eru margvísleg en hún er meðal annars eina konan í Fjallabræðrum. „Það er æðislegt að vera eina konan í Fjallabræðrum því ég fæ að vera algjör prinsessa.“