„Ég er rómantískur töffari“

Sandra Matthíasdóttir starfar á veitingahúsinu Kopar og lýsir sjálfri sér sem rómantískum töffara.

Hún hefur mikla unun af öllu sem tengist mat, hvort sem það er að elda eða baka. Sandra er einnig mikið fyrir að klæða sig upp hvort sem það er í pelsa eða leður. Hún segist aðhyllast allt sem er þægilegt og er mjög mikið fyrir kjóla og prinsessuleiki þegar hún fer út.

Leðurjakkinn

Studs-leðurjakki sem ég keypti af góðri vinkonu minni Catherine. Ég held mikið upp á jakkann þar sem ég veit að það er bara ein önnur manneskja sem á svona.

Buxurnar eru úr Kúltúr og einn af mínum uppáhaldskrögum sem er úr þvottabjarnarskinni. Skórnir eru frá merkinu Iron Fist og ég fékk þá í gjöf frá unnusta mínum.

Karen Millen-kjóllinn



Þetta er einn mínum fyrstu Karen Millen-kjólum og er í miklu uppáhaldi. Hann er alltaf sígildur. Iron Fist-skórnir eru gjöf frá mínum heittelskaða. Chanel-taska, en Chanel er uppáhaldshönnuðurinn minn. Leðurhanskarnir eru úr H&M.

Pelsinn

Pelsinn fékk ég í gjöf frá pabba mínum þegar ég bjó í Kaupmannahöfn en ég gróf hann upp hjá konu sem hafði fengið hann frá mömmu sinni og því lofaði ég henni að passa rosalega vel upp á hann.

Buxurnar eru úr Zöru og nota ég þær mikið við öll tækifæri. Svartir „plain“ hælaskór. Þetta er dress sem ég myndi skella mér í til að fara út að borða með unnustanum.

Hversdags

Þetta er hversdagsdress. Buxurnar eru frá Kúltúr og ég á fimm í öðrum litum því þetta eru einfaldlega geggjaðar buxur. Basic hlýrabolur, kósý peysa og ekki má gleyma húfunni í fallega haustveðrinu.