Bjór og trú í Laugardal

Októberfest verður haldið í risatjaldi í Laugardalnum á föstudag og laugardag.

Á meðal atriða verða fræðsluleikritið Bjórsaga með Víkingi Kristjánssyni, fullorðinssirkusinn Skinnsemi, pub-quiz með Hjörvari Hafliðasyni og einnig kemur fram hópur listamanna og uppistandara, þar á meðal Halldór Gylfason, Lee Nelson, Sólmundur Hólm, Steindi jr. og Bent.

Bjórhátíðin skarast á við trúarhátíðina Hátíð vonar sem verður haldin í Laugardalshöll, hinum megin við götuna, á laugardag og sunnudag.

Aðstandendur Októberfest vilja endilega fá gesti trúarhátíðarinnar í heimsókn til að smakka á bjórnum og skemmta sér en óvíst er hvort þeim verður að ósk sinni.