Lífið

Kærasti minn er bakhöndin mín

Ása Ottesen skrifar
Ástrós Erla Benediktsdóttir er spennt fyrir nýja hlutverkinu. Hún verður yfirkennari og skólastjóri í nýjum förðunarskóla.
Ástrós Erla Benediktsdóttir er spennt fyrir nýja hlutverkinu. Hún verður yfirkennari og skólastjóri í nýjum förðunarskóla. fréttablaðið/Daníel
„Ég er ótrúlega spennt fyrir þessu nýja verkefni. Ég er á fullu í háskólanum og er í Stúdentaráði líka,“ segir Ástrós Erla Benediktsdóttir, nýráðinn yfirkennari og skólastjóri við förðunarskólann NN Make Up School.

NN Make Up School er í eigu förðunarmeistarans Kristínar Stefánsdóttir, sem gaf nýverið út bókina Förðun skref fyrir skref, og opnar skólinn í byrjun október.

„Það er svolítið skondið hvernig þetta byrjaði.

Ég var fengin til þess að sitja fyrir í förðunarbók Kristínar og áður en ég vissi af var ég farin að aðstoða við stíliseringu í bókinni og hjálpa til við hitt og þetta. Í framhaldi af því kynntist ég Kristínu betur og hún sagði mér frá skólanum sem hún stefndi á að opna. Við náðum mjög vel saman og henni leist vel á mig.

Ástrós að störfum
Þegar hún svo bauð mér að vera yfirkennari og skólastjóri kom ekkert annað til greina en að taka starfinu. Það hefur verið draumur lengi að kenna förðun,“ segir Ástrós, sem útskrifaðist sem förðunarfræðingur fyrir þremur árum.

Förðun Ástrósar
Ástrós hefur í nógu að snúast en hún er að klára B.A-nám í félagsráðgjöf frá Háskóla Íslands, ásamt því að sitja í Stúdentaráði fyrir hönd Vöku og vera í félags- og menningarmálanefnd Háskólans.

„Ég hef engar áhyggjur af því að þetta gangi ekki upp. Ég þarf bara að skipuleggja mig rosalega vel og vakna snemma. Kærastinn minn er bakhöndin mín og ef hann treystir mér veit ég að ég er að gera rétt,“ segir Ástrós að lokum.






Fleiri fréttir

Sjá meira


×


Tarot dagsins

Dragðu spil og sjáðu hvaða spádóm það geymir.