Nýr meðlimur Ísland í dag

„Ég er mjög spennt fyrir nýja starfinu. Sjónvarpsmiðill hefur alltaf heillað mig og mig hefur lengi langað til þess að kynnast honum betur,“ segir fjölmiðlakonan Birta Björnsdóttir sem hefur hafið störf í fréttaþættinum Ísland í dag á Stöð 2. Birta starfaði áður sem blaðamaður á Morgunblaðinu og á dagskrársviði 365 miðla.



Nýja hlutverkið leggst vel í hana. „Ég fæ þarna tækifæri til þess að prófa spennandi miðil og fæ strax að spreyta mig á fjölbreyttum verkefnum. Ég viðurkenni að ég hef verið með smá hnút í maganum, eins og eflaust alltaf þegar maður byrjar í nýrri vinnu,“ segir Birta og bætir við að samstarfsfólk hennar hafi verið henni afskaplega hjálplegt þessa fyrstu daga.



Birta tekur nýja starfinu með mikilli auðmýkt og kveðst lítið velta fyrir sér að hún verði tíður gestur á skjánum á heimilum landsmanna. „Þetta er nú ekkert merkilegri vinna en hver önnur.

Ég sótti ekki um starfið vegna sýnileikans. Mér finnst spennandi að fá að segja sögur í sjónvarpinu og deila þeim með fólkinu í landinu,“ segir Birta glöð í bragði að lokum.