Gefa út Sögu um nótt

„Þegar Saga, dóttir mín, var tveggja ára tók hún upp á því að verða myrkfælin. Ég ákvað að segja henni sögu til að minna hana á að myrkrið væri ekkert hættulegt. Svo eltist myrkfælnin af Sögu en mér þótti sagan falleg og skrifaði hana niður í þeim tilgangi að gefa hana út. Ég hafði samband við Lóu upp á að myndskreyta bókina en svo fæddust nokkur börn, Lóa fór í tónleikaferðalag og ég í borgarstjórn og því varð ekkert úr útgáfunni fyrr en nú,“ segir Eva Einarsdóttir, borgarfulltrúi Besta flokksins. Hún samdi barnabókina Sögu um nótt, sem gefin verður út af Bókabeitunni fyrir jól. Listakonan Lóa Hlín Hjálmtýsdóttir myndskreytir bókina.

Eva segir myndir Lóu vera í miklu uppáhaldi hjá sér. Því hafi legið beinast við að biðja hana um að myndskreyta bókina. „Með hennar hjálp varð litla sagan mín að glæsilegri bók,“ segir hún.

Lóa hefur vakið athygli í gegnum tíðina fyrir skrítnar og skemmtilegar teikningar sínar. Hún kom meðal annars að gerð sjónvarpsþáttanna Hulla sem sýndir eru í Sjónvarpinu um þessar mundir.

„Myndirnar í bókinni eru málaðar, ég var ekki með gamla tússpennann á lofti í þetta skiptið. Það var gaman að spreyta sig á því að teikna eitthvað fallegt til tilbreytingar og ekki vinna í hálfvitum eins og vanalega,“ segir hún og hlær. „Það fyndna er að þetta var alltaf mitt markmið í lífinu, ég fór í nám í Bandaríkjunum til að læra myndskreytingar, en svo endaði ég í hljómsveit.“

Lóa Hlín hefur áður gefið út bókina Alhæft um þjóðir en Saga um nótt er fyrsta bók Evu. „Þetta er mjög nýtt og spennandi fyrir mér. Myndirnar hennar Lóu eru listaverk út af fyrir sig og þetta verður því jólagjöfin í ár á mínu heimili,“ segir Eva að lokum og hlær.

Hér má sjá hugmynd að kápu bókarinnar.