Nýr borgari vígður á Fabrikkunni

Hamborgari til heiðurs hljómsveitinni Sálin hans Jóns míns verður vígður á Hamborgarafabrikkunni á næstu dögum. Mikil dulúð og leynd hvílir yfir þessum nýja og ferska hamborgara.

Borgarinn er gerður úr ferskri nautalund og getur fólk fengið hann borinn fram með sneið af steiktri, franskri andalifur (foi gras), ofan á, ásamt trufflu-Bernaise sósu.

„Ekkert annað en besti bitinn af nautinu dugði í þennan merka viðhafnarborgara til heiðurs þessari stórmerkilegu hljómsveit,“ segir Jóhannes Ásbjörnsson, einn af eigendum Fabrikkunnar, um vígsluna. Borgarinn heitir í höfuðið á þekktu dægurlagi sveitarinnar.