„Ég er strípalingur“

Miley Cyrus segist vera hálfgerður strípalingur. Hún prýðir forsíðu tímaritsins Rolling Stone, þar sem hún rekur út úr sér tunguna og virðist vera nakin.

Í blaðinu ræðir Cyrus um atburðinn umdeilda sem átti sér stað á MTV-tónlistarhátíðinni, þar sem hún viðurkennir að hafa gengið örlítið lengra en hún ætlaði sér í atriðinu með Robin Thicke.

Hún segir jafnframt að henni finnist skrítið að lítil sem engin umræða hafi átt sér stað varðandi hegðun Thicke. „Það talar enginn um manninn sem stendur þarna við rassinn á mér. Það er bara rætt um þann sem beygir sig niður,“ segir Cyrus í viðtalinu.