Rotþró á Hakinu að springa undan álagi

„Stöðin er sprungin og annar ekki eftirspurn,“ segir Þórir Sigurgeirsson, framkvæmdastjóri Tengis, um frárennslistöð sem tekur við skolpi úr snyrtingum ferðamanna á Hakinu á Þingvöllum.

Eins og fram kom í Fréttablaðinu 5. júlí síðastliðinn telur Heilbrigðiseftirlit Suðurlands að þrátt fyrir að um sé að ræða viðurkennda fráveitulausn við snyrtingarnar á Hakinu uppfylli stöðin ekki kröfur um hreinsun skólps. Það eigi sérstaklega við um minnkun köfnunarefnis og fosfórs. Lágt hitastig yfir vetrartímann dragi verulega úr hreinsivirkninni.

Stöðin frá Tengi er af gerðinni Inno Clean. Þórir segir margar slíkar stöðvar um allt land virka mjög vel. Stöðvunum er ætlað að hreinsa skolpið áður en það fer út í jarðveginn.

„Varðandi stöðina á Hakinu sem er af sömu gerð þá er staðan einfaldlega sú að hún annar ekki eftirspurn, það eru miklu fleiri að nýta sér salernisaðstöðuna en ráð var fyrir gert í upphafi,“ segir Þórir. Rétt sé að virkni stöðvarinnar sé minni á veturna vegna kulda. Það hafi þó einfaldega ekki úrslitaáhrif.

„Hönnunin var vanáætluð í upphafi og menn gerðu sér alls ekki grein fyrir því hversu gríðarleg fjölgun myndi verða á ferðamönnum á Íslandi,“ segir Þórir. „Það fer eftir stærð stöðvarinnar hvað hún er afkastamikil og það kom bersýnilega í ljós eftir síðustu mælingar að stöðin er sprungin. Það er ástæða þess að hún uppfyllir ekki þær kröfur sem til hennar eru gerðar.“

Ólafur Örn Haraldsson, þjóðgarðsvörður á Þingvöllum, bendir á að grundvöllur ályktana heilbrigðiseftirlitsins sé aðeins ein mæling í stöðinni á Hakinu. Strax hafi verið brugðist við með því að tæma stöðina. Hann hafi einnig óskað eftir nýrri mælingu og bíðu nú eftir niðurstöðu hennar.

Ólafur kveður það algerlega ný tíðindi fyrir sér að stöðin sé of lítil og virki ekki.

„Ef það reynist rétt þá finnst mér að þjóðgarðurinn megi hugsa það mjög rækilega að setja upp safntank í staðinn fyrir þessa stöð og keyra allt frárennsli í burtu. Því það er alveg ófrávíkjanlegt að þjóðgarðurinn verður að hafa þessi mál í fullkomnasta lagi,“ segir þjóðgarðsvörður.