Flugfreyjur ósáttar við myndavélaeftirlit

Eftirlitsmyndavélar sem beinst hafa að sameiginlegum inngangi og bílastæðum við Borgartún 22 eru ekki settar upp í samræmi við lög að mati Persónuverndar. Flugfreyjufélag Íslands kvartaði undan eftirlitsmyndavélunum.

Eftirlitsmyndavélarnar voru settar upp af eigendum Borgarefnalaugarinnar. Auk efnalaugarinnar eru Flugfreyjufélag Íslands, Flugvirkjafélag Íslands, Geðvernd og fleiri með aðstöðu í húsinu auk þess sem þar er veislusalur sem leigður er út.

Í kvörtun Flugfreyjufélagsins til Persónuverndar vegna eftirlitsmyndavélanna segir að tilgangurinn með uppsetningu þeirra sé að vakta notkun bílastæða við húsið en ekki að verja eigur fyrir skemmdarverkum. Það telur félagið brjóta í bága við reglur um uppsetningu eftirlitsmyndavéla.

Í kvörtuninni segir að eigendur efnalaugarinnar vilji vakta stæði við húsið. Þeir vilji að þau séu aðeins notuð í 20 mínútur í senn.

„Eigendur hafa auk þess gengið svo langt að spyrja aðila sem erindi eiga í húsið hvert erindið sé og hversu langan tíma standi til að leggja við húsið,“ segir í kvörtuninni. Þar segir ennfremur að uppsetningin hafi ekki verið kynnt öðrum eigendum húsnæðisins.

Komið í veg fyrir skemmdarverk

„Telur Flugfreyjufélag Íslands að með uppsetningu vélanna sé vegið að rétti þeirra sem sækja þjónustu í húsið eða skjólstæðinga starfsemi hússins, til að mynda Geðverndar sem starfar á annarri hæð. Ljóst er að önnur starfsemi hússins getur ekki tekið mið af 20 mínútna reglu um skammtímastæði né getur boðið skjólstæðingum sínum upp á að vera „í beinni“ þegar leitað er til þjónustuaðila hússins,“ segir í kvörtuninni.

Eigendur efnalaugarinnar mótmæltu kröfum Flugfreyjufélagsins og sögðu tilgang eftirlitsins aðeins að fylgjast með húseigninni til að koma í veg fyrir skemmdarverk. Er þess meðal annars getið í svari þeirra til Persónuverndar að efni úr myndavélunum hafi nýst til að upplýsa skemmdarverk á húsinu.

Í vettvangsheimsókn Persónuverndar kom í ljós að myndavélarnar beindust sannarlega að inngangi, gangstétt og bílastæðum. Í úrskurði stofnunarinnar er eigendum gefinn stuttur frestur til að breyta sjónarhorni myndavélanna svo þær beinist eingöngu að húsnæðinu.

Takmarkaður réttur til eftirlits

Ætli eigendur húseignar sér að koma upp eftirlitsmyndavél eða myndavélum þarf að uppfylla ákveðin skilyrði.

• Vöktunin verður að vera nauðsynleg og fara fram til að verja eigur eða tryggja öryggi.
• Ekki má afhenda myndir úr eftirlitsmyndavélunum öðrum en lögreglu nema samþykki þess sem sést á myndunum fáist.
• Efni sem safnað er með myndavélunum á að eyða þegar ástæður til að geyma það eru ekki lengur til staðar, ekki seinna en eftir 90 daga.