Óvíst hvort nýr forseti tekur við bráðlega

Tugir þúsunda stuðningsmanna stríðandi fylkinga í Egyptalandi sýndu styrk sinn í fjöldagöngum á götum Kaíró í gær.

Stuðningsmenn Mohammad Morsi, sem herinn steypti af stóli forseta þann 3. júlí, hafa haldið til við Rabaa al-Adawiya-moskuna undanfarna viku en gengu í gær að höfuðstöðvum hersins. Andstæðingar söfnuðust saman á Tahrir-torginu.

Morsi situr í gæsluvarðhaldi og hefur Adly Mansour, yfirdómari stjórnlagadómstólsins, tekið við valdataumunum. Fréttir bárust af því fyrir helgi að til stæði að Mohammed Elbaradei, einn af leiðtogum stjórnarandstöðunnar, ætti að taka við forsetaembættinu, en þær fréttir hafa verið bornar til baka. Óvíst er hvort herinn ætli sér að skipta um forseta bráðlega.

Mótmælaaldan í Egyptalandi hófst snemma árs 2011 þegar setu Hosni Mubarak á forsetastóli var mótmælt. Hann hafði verið einráður í landinu í nærri þrjá áratugi. Skömmu síðar hrökklast Mubarak frá völdum og herinn hljóp í skarðið. Í lok árs 2011 hófust þingkosningar í Egyptalandi. Fáum kom á óvart Íslamistar unnu þar glæstan sigur. Í forsetakosningunum sigraði Morsi naumlega. En herinn tók sér aukin völd á kostnað forsetans með breytingu á stjórnarskrá. Stjórnarskrárdómstóll landsins leysti upp neðri deild þingsins og herinn rýmdi þingið.

Þann 30. júní 2012 tók Morsi formlega við embætti forseta. Örfáum mánuðum síðar hafði Morsi leyst helstu leiðtoga hersins frá störfum og ógilt síðustu stjórnarskrárbreytingu hersins sem kosið hafði verið um.

Fjölmenn mótmæli gegn aðgerðum Morsi brutust út. Í framhaldinu varð til ný stjórnarskrá, sem samþykkt í þjóðaratkvæðagreiðslu undir lok ársins.

Þann 30. júní síðastliðinn, tóku milljónir þátt í mótmælum gegn Morsi og kröfðust afsagnar hans.

Þann þriðja júlí var Morsi svo velt af stóli forseta af hernum og hann handtekinn.