Óíbúðarhæft vegna skolplyktar

„Þetta er misjafnt en hefur verið að versna,“ segir Elías Þorvaldsson, einn íbúa við Eyrarflöt á Siglufirði sem sendu bæjaryfirvöldum undirskriftalista með ósk um úrbætur vegna ólyktar af skolplögnum í fjörunni neðan við hverfið.

Bærinn er beðinn að stemma stigu við „óþolandi lyktarmengun“ sem stafi frá skolpi sem safnist saman vegna ófullnægjandi frágangs á frárennslislögnum. „Straumarnir ná einfaldlega ekki að koma þessu frá okkur,“ útskýrir Elías.

Íbúarnir segja að áður hafi verið fundað með bæjarstjóranum og tveir fundir haldnir í tækninefnd bæjarins síðan án þess að málið hafi verið rætt í nefndinni. Samdóma álit sé að ástandið hafi aldrei verið verra miðað við árstíma.

„Þar sem stutt er í sól og sumar með hækkandi lofthita er hætt við að ástandið versni enn frekar og verði þannig að ekki verði búandi á svæðinu,“ segir í bréfi íbúanna sem Elías kveður hafa fengið mjög jákvæðar undirtektir. „Við erum búin að fá svör um að þetta verði vonandi lagfært og erum ánægð með það,“ segir hann.