Útidúr safnar fyrir nýrri plötu

Útidúr leggur nú lokahönd á nýja plötu, Detour, sem áætlað er að komi út 15. apríl. Hún verður gefin út með aðstoð hópfjármögnunar í gegnum vefsíðuna Indiegogo.com.

„Við fjármögnum plötuna sjálf. Kári Einarsson, bassaleikarinn okkar, hefur verið að taka hana upp sjálfur og okkur vantaði upp á til að „mastera" hana og framleiða. Þá peninga áttum við ekki til," segir píanóleikarinn Kristinn Roach Gunnarsson.

Hljómsveitin hefur nokkrar vikur til að safna sér inn ákveðinni upphæð sem svo er notuð til að gefa út plötuna. Þeir sem taka þátt í söfnuninni verða þeir fyrstu til að eignast plötuna og geta jafnframt valið á milli óhefðbundins varnings tengdum henni, til dæmis teikningu frá söngvaranum Gunnari Erni Egilssyni, trommukjuða eða frumsamið lag tileinkað kaupanda. Í gær höfðu safnast rúmar 150 þúsund krónur af þeim rúmu 400 þúsund krónum sem stefnt er að. „Mér finnst þetta mjög sniðug hugmynd," segir Kristinn Roach um söfnunina.

Útidúr er tíu manna sveit sem spilar léttleikandi kammerpopp. Þrjú ár eru liðin síðan fyrsta plata hennar. This Mess We"ve Made, kom út. Síðan þá hefur söngkonan Rakel Mjöll Leifsdóttir yfirgefið bandið og í staðinn er komin Sólveig Anna Aradóttir.