Óverðtryggð lán eru oft verri

„Verðtryggð lán eiga að vera valkostur fyrir lántakendur því verðtryggð lán eru ekki eins slæmur kostur og menn vilja vera láta,“ segir Agnar Jón Ágústsson, viðskipta- og hagfræðingur hjá gagnavefnum Datamarket.

Í grein í Fréttablaðinu í dag gerir hann samanburð á verðtryggðum og óverðtryggðum lánum. Hann kemst að þeirri niðurstöðu að verðtryggð lán geti stundum verið betri kostur fyrir lántakendur, ekki síst á erfiðum verðbólgutímum þegar vaxtakostnaður óverðtryggðu lánanna hækkar upp úr öllu valdi.

Að sögn Agnars Jóns hafa þeir, sem vilja afnema verðtrygginguna, enn ekki gert grein fyrir því hvaða fyrirkomulag eða lánsform geti komið í staðinn fyrir verðtryggðu lánin.

„Íbúðalántakendur á Íslandi greiða 2-3 sinnum hærri vexti að jafnaði af íbúðalánum sínum en gengur og gerist í nágrannalöndunum og búa við sveiflukennt og áhættusamt fjármálaumhverfi. Það er vandamálið og því þarf að breyta,“ segir Agnar Jón í grein sinni.