Barkabólgu hefur líklega verið útrýmt

Matvælastofnun telur líkur á því að smitandi barkabólga hafi verið upprætt með slátrun allra þeirra gripa sem reyndust smitaðir á Egilsstaðabúinu á Völlum síðastliðið haust.

Smitandi barkabólga greindist í gripum á búinu við reglubundna leit Matvælastofnunar að smitandi sjúkdómum í íslenska kúastofninum. Við nánari rannsókn og endurteknar sýnatökur úr öllum nautgripum reyndust 34 kýr hafa smitast á Egilsstöðum. Einnig fundust vísbendingar um smit í einni kú sem fæddist á Egilsstöðum og hafði verið flutt að Fljótsbakka á Héraði.

Í kjölfarið var gerð rannsókn á öllum mjólkurframleiðslubúum í landinu og á nautgripum í nautabúinu í Hrísey og nautum og nautasæði í Nautastöðinni á Hesti. Ekki fundust neinar vísbendingar um sjúkdóminn annars staðar en í kúm frá Egilsstöðum og Fljótsbakka.

Næst verða tekin blóðsýni eftir fimm mánuði á Egilsstöðum og Fljótsbakka. Ef ekki mælast mótefni gegn smitandi barkabólgu í sýnum má gera ráð fyrir að sýkingunni hafi verið útrýmt úr íslenska nautgripastofninum, að því er segir í tilkynningu.