Vilja sérstaka afeitrunarmeðferð fyrir konur

„Það er mjög brýnt að byrja á því að kynjaskipta afeitruninni og skoða þessar kvennameðferðir sem eru í gangi til að sjá hvað má betur fara,“ segir Ilmur Kristjánsdóttir, leikkona og stofnfélagi Rótarinnar – félags um málefni kvenna með áfengis- og fíknivanda.

Félagið var stofnað í byrjun sem Kvenfélag SÁÁ, en hefur nú klofið sig úr samtökunum vegna samskiptaörðugleika við formann félagsins, Gunnar Smára Egilsson. Hann vísaði öllum ásökunum á bug í fjölmiðlum í vikunni og sagði árekstrana fyrst og fremst vera á milli Rótarinnar og sérfræðinga innan SÁÁ.

Ilmur segir forsvarsmenn félagsins hafa hrokkið í vörn þegar Kvenfélag SÁÁ var stofnað og tekið það sem gagnrýni á starfið. „Það er einhver vörn í gangi sem við skiljum ekki,“ segir hún. „Þeir eru viðkvæmir fyrir því að við segjum að þetta sé karllæg meðferð og þeir séu að gera eitthvað vitlaust - en það er ekki rétt. Það eina sem við viljum gera er að skoða hlutina og reyna að betrumbæta.“

Ilmur segir það þekkta staðreynd að færri konur en karlar leiti sér aðstoðar vegna fíknivanda og setur spurningarmerki við það. „Áttatíu prósent kvenna inni á Vogi hafa til að mynda orðið fyrir einhvers konar ofbeldi og þessar upplýsingar eru ofan í skúffu,“ segir hún. „Við þurfum að færa úrræðin sem við bjóðum upp á inn í 21. öldina.“