Skattaívilnanir og milljarða framlög

Atvinnuvegaráðherra fær heimild til að semja um framkvæmdir í tengslum við uppbyggingu á Bakka fyrir 3,4 milljarða króna. Ríkið veitir ívilnanir vegna verkefnisins umfram þær sem lög kveða á um. Umtalsverður skattaafsláttur gefinn.

Steingrímur J. Sigfússon, atvinnuvega- og nýsköpunarráðherra, fær heimild til að skuldbinda ríkissjóð til útgjalda upp á 3,4 milljarða króna í tengslum við uppbyggingu stóriðju á Bakka, verði frumvarp um það að lögum. Að auki er farið fram á heimild til að veita ýmsar ívilnanir í tengslum við verkefnið, meiri en kveðið er á um í lögum um ívilnanir vegna fjárfestinga.

Frumvarpið gerir ráð fyrir því að tekjuskattur rekstrarfélags kísilvers á Bakka, PCC BakkiSilicon hf., verði fimmtán prósent, en ekki tuttugu prósent eins og lög gera ráð fyrir að megi semja um. Þá verði félagið algjörlega undanþegið tryggingargjaldi, en heimild er í lögum að semja um að félög greiði tuttugu prósent gjaldsins. Þá er gert ráð fyrir að félagið greiði engin stimpilgjöld af skjölum sem það gefur út og njóti 50 prósenta afsláttar af fasteignagjöldum. Heimild er til að semja um 30 prósenta afslátt af fasteignagjöldum. Loks er gert ráð fyrir því að þau skattafrávik gildi í fjórtán ár.

„Áætlað er að þær ívilnanir sem ríkið veitir til verkefnisins vegna frávika frá sköttum og gjöldum, það er lægra tekjuskattshlutfall og undanþága frá almennu tryggingagjaldi og stimpilgjaldi, geti verið um 100–150 m.kr. á ári eða um 1–1,5 mia.kr. á 10 ára tímabili frá því að starfsemin hefst," segir í frumvarpinu. Það þýðir 1 til 1,5 milljarða króna tekjumissi fyrir ríkið á tímabilinu, sem bætist við þau útgjöld sem fyrr var um getið.

Í umsögn fjármálaskrifstofu fjármála- og efnahagsráðuneytisins um frumvarpið er því velt upp hvort verið sé að setja fordæmi fyrir þá sem sækja um sams konar fjárfestingarverkefni.

Ríkisstjórnin fól á föstudag fjármálaráðherra að ræða við aðila í Reykjanesbæ vegna framkvæmda við Helguvík.