Matarmarkaður verði á Lækjartorgi í sumar

Verkefnahópur á vegum Reykjavíkurborgar leggur til að fjölbreyttur matarmarkaður verði á Lækjartorgi í sumar og að utanaðkomandi ráðgjafi komi á sambandi við sölumenn. Hópurinn sér Hlemm sem markaðshöll þegar Strætó hefur flutt.

„Við stefnum að því að markaðurinn heppnist vel og verði vel sóttur,“ segir Hildur Gunnlaugsdóttir arkitekt sem fer fyrir verkefnahópi sem leggur til að matarmarkaði verði komið upp á Lækjartorgi næsta sumar.

„Á markaðnum skal vera gott úrval af vörum til sölu,“ segir í niðurstöðum verkefnahópsins sem er á vegum skipulagsfulltrúa Reykjavíkur. Hópnum var falið að kanna hugmynd að vefnum Betri Reykjavík um matarmarkað við höfnina. Eftir að hafa skoðað ýmsar staðsetningar í miðborginni segir hópurinn hins vegar Lækjartorg ákjósanlegt fyrir slíkan markað. Í tillögu hópsins er gert ráð fyrir að matarmarkaðurinn verði haldinn fjóra laugardaga, en oftar ef vel tekst til.

„Erfiðlega hefur gengið að koma á matarmarkaði í Reykjavík hingað til,“ segir hópurinn sem ræddi við ýmsa mögulega söluaðila. „En það var ekki að finna mikinn áhuga á að taka þátt.“

Þá segir að Fiskmarkaðnum við höfnina árið 2010 og „Full borg matar“-markaðnum hafi gengið erfiðlega að fá seljendur.

„Söluaðilar nefndu margar ástæður fyrir þessu en helst var þó nefnt að kostnaður við þátttöku væri mikill en ávinningur lítill,“ segir í umsögninni þar sem þó er tekið fram að mjög stórir og velheppnaðir markaðir hafi verið við verslunina Búrið í Nóatúni fyrir jólin 2011 og 2012. Utan um þann markað hafi verið haldið af mikill þekkingu og reynslu á markaðshaldi.

„Því er lagt til að ráðinn verði utanaðkomandi ráðgjafi til þess að koma á sambandi við söluaðila og skipuleggja markaðinn,“ segir starfshópurinn sem leggur til að svokallaður biðstjóri annist umsjón markaðarins, meðal annars uppsetningu tjalda og skjólveggja. Faxaflóahafnir eru sagðar munu lána söluborð með vöskum fyrir fisk og kjöt. Varðandi söluvörurnar segir verkefnahópurinn að líta eigi til þess að vera frekar með „góða blöndu“ en marga seljendur.

Í umsögninni er horft til framtíðar. Miklir möguleikar séu á að nýta megi Hlemm sem markaðshöll þegar starfsemi Strætó flyst þaðan. „Þar væri hægt að hafa markað bæði inni í húsinu og fyrir utan það,“ segir í umsögninni sem samþykkt var í umhverfis- og skipulagsráði.