Ekki einelti

Margir misskilja og misnota orðið einelti. Stjórnmálamenn, listamenn, íþróttamenn og fleiri nota orðið einelti um ýmislegt sem er alls ekki einelti en er e.t.v. dónaskapur, móðgun, hroki eða yfirgangur. Hugtakið einelti hefur sérstaka merkingu sem er mjög svipuð meðal vestrænna þjóða. Það er skilgreint sem framkoma sem er ámælisverð og stendur yfir í langan tíma. Til að hnykkja á því að framkoman þurfi að standa yfir í langan tíma er í sumum erlendum skilgreiningum talað um allt að sex mánuði. Einstakir atburðir geta aldrei verið einelti, einelti varir í mánuði og ár. Ég ætla að nefna tvö nýleg dæmi um misnotkun á hugtakinu einelti.

1. Eftir áramótin skrifaði fyrrverandi stjórnmálamaður og bloggari að íþróttafréttakona hefði verið lögð í einelti í áramótaskaupinu. Það kann að vera að umfjöllun skaupsins um konuna hafi verið dónaleg, of mikil, ekki fyndin eða á einhvern hátt ekki til fyrirmyndar en það snýst allt um smekk áhorfenda. Einelti snýst ekki um smekk og það getur aldrei átt sér stað í klukkutíma skemmtiþætti.

2. Eftir borgarafund í Grafarvogi sagði borgarstóri að hann hefði verið lagður í einelti á fundinum. Samkvæmt lýsingu þeirra sem sátu fundinn gekk mikið á þar, sumir voru dónalegir og notuðu ljót orð. Það að verða fyrir harðri og jafnvel særandi gagnrýni og dónaskap á fundi er að sjálfsögðu ekki gott en það er alls ekki einelti. Einelti stendur yfir mánuðum eða árum saman.

Einelti er mjög alvarlegt og veldur þolanda, fjölskyldu og vinum viðkomandi miklum þjáningum. Það verður að bera meiri virðingu fyrir hugtakinu einelti og nota það af hófsemi, annað er vanvirðing við raunverulega þolendur eineltis. Ef orðið einelti er notað um allt sem miður fer í samfélaginu er verið að gengisfella það og gera það marklaust. Stjórnmálmenn og aðrir sem eru áberandi í samfélaginu þurfa að gæta sérstaks hófs við notkun hugtaksins.