Litlar líkur á tillögu um vantraust á stjórn

Ríkisstjórn Jóhönnu Sigurðardóttur hefur ekki haft þingmeirihluta síðan Róbert Marshall sagði sig úr þingflokki Samfylkingarinnar 11. október í fyrra. Síðan þá hefur hún því verið minnihlutastjórn.

Vaninn er að slíkar stjórnir semji við stjórnarandstöðu, eða að minnsta kosti hluta hennar, um stuðning, en sú hefur ekki verið raunin nú. Stjórnin hefur haft stuðning einstakra þingmanna í ákveðnum málum og komið mörgum stórum málum í gegn. Nægir að nefna Rammaáætlun um vernd og nýtingu náttúrusvæða í því efni.

Eftir að Icesave-dómurinn féll á mánudag hafa þær raddir orðið háværari að réttast væri að ríkisstjórnin færi frá og rætt hefur verið um að leggja fram tillögu um vantraust. Það var síðast gert í apríl 2011, þegar tillaga Bjarna Benediktssonar, formanns Sjálfstæðisflokksins, var felld með 32 atkvæðum gegn 30.

Síðan hafa orðið ýmsar vendingar og fækkað í stjórnarliðinu um tvo; Róbert hjá Samfylkingu og Jón Bjarnason hjá Vinstri grænum.

Litlar líkur eru þó á að tillaga um vantraust yrði samþykkt nú. Róbert og Guðmundur Steingrímsson eru á kafi í undirbúningi kosninga með nýjum flokki, Bjartri framtíð, og flýting kosninga er ekki efst á óskalista þeirra. Þá hefur Hreyfingin lagt gríðarlega áherslu á breytingar á stjórnarskránni og mun telja bestu leiðina til að þær náist fram þá sem núverandi stjórn stendur fyrir.

Þá má ekki gleyma því hve stutt er eftir af þinginu, en því verður frestað 15. mars. Yrði vantraust samþykkt nú er langlíklegasta niðurstaðan að stjórnin mundi sitja fram að kosningum sem starfsstjórn.

Samkvæmt heimildum Fréttablaðsins hafa engar þreifingar verið um stuðning við vantrauststillögu utan Sjálfstæðis- og Framsóknarflokks.

Sé ætlunin að leggja slíka tillögu fram, í kjölfarið á Icesave-dómnum, má segja að sú tillaga yrði að koma fram í dag. Enginn þingfundur er á morgun, vegna landsfundar Samfylkingarinnar, og næsta vika er kjördæmavika. Næsti fundur er því ekki fyrr en 11. febrúar og augnablikið varðandi Icesave liðið hjá, auk þess sem rétt rúmur mánuður verður þá til kosninga.

Staðan er því sú að komi ekki til vantrauststillögu í dag lítur hún trauðla dagsins ljós á yfirstandandi þingi.